Seerat e Tayyaba Ka Har Pahlu Namuna e Amal Hai

Alehsan Media نومبر 13, 2016

سیرت طیبہ کا ہرپہلو نمونۂ عمل ہے

حضور داعی اسلام ادام اللہ ظلہ علینانےمرشداعظم، ہادی دوعالم ﷺ کے طرز دعوت وتبلیغ کے حوالے سے گفتگو کرتے ہوئے فرمایاکہ نبی کریم ﷺ کی دعوتی زندگی کے دو پہلو ہیں: ۱۔مکی زندگی ۲۔مدنی زندگی مکی زندگی کے دو حصے ہیں: ۱۔قبل اعلان نبوت ۲۔بعداعلان نبوت اور مدنی زندگی کے بھی دو حصے ہیں: ۱۔قبل فتح مکہ ۲۔بعدفتح مکہ
ہر ادوارمیں آپ کی دعوت کے اسلوب الگ رہے اور جب اخیر میں مکہ فتح ہوا اوراسلام کوغلبہ حاصل ہوگیاتوفتح مکہ کے بعد جو اصول وضوابط اور قوانین نافذکیے گئے وہی اسلامی قوانین آج بھی جاری ہیں اوراسلامی نظام کی بقااورحفاظت انھیں قوانین کے قیام ونفاذ میں ہے ۔
لیکن جب بھی کوئی مرد مومن، داعی ومبلغ دعوت وتبلیغ کے میدان میں نکلے تو یہ ضروری ہوگا کہ مرشداعظم نبی آخر الزماں ﷺ کی مکمل زندگی اس کے سامنے ہواورسیرت طیبہ کا کوئی بھی پہلواس کی نظرسے اوجھل نہ ہو۔ مرشداعظم ﷺ کی حیات طیبہ کی روشنی میں وہ داعی ومبلغ یہ طے کرے کہ کب اس کو خلوت اختیار کرنا ہےاور کب دعوت؟ کب اسلام کی خاموش تبلیغ کرنی ہے اورکب اعلانیہ؟کب اسے قریبی رشتے داروںمیں اللہ کا پیغام پہنچاناہے اورکب ساری کائنات کو اپنی دعوت کا مخاطب بناناہے؟کب ہجرت کرنی ہے اورکب صلح ومعاہدہ ۔

رسول اللہ ﷺ کی مکمل زندگی ہمارے لیے اسوۂ حسنہ اورنمونۂ عمل ہے۔ ایسا نہیں کہ ایک پہلو تو قابل عمل اور نمونۂ حیات ہے اوردوسرا پہلولائق عمل نہیں۔جب کہ اللہ کاارشاد ہے:لَقَدْ كَانَ لَكُمْ فِيْ رَسُوْلِ اللّٰهِ اُسْوَةٌ حَسَنَةٌ (احزاب:۲۱)

خضرِراہ ، جنوری ۲۰۱۶ء

(ترتیب: مجیب الرحمن علیمی)