جامعہ ازہر خالص روحانیت اور دین فطرت کا مبلغ و داعی ہے : مولانامجیب الرحمٰن
سید سراواں (پریس ریلیز )
8 ؍نومبر 2016
جامعہ عارفیہ کی طلبہ ٹیم’’جمیعۃ الطلبہ‘‘کی جانب سے امسال جامعہ ازہرسے دعوت وتبلیغ کاکورس مکمل کرنے والے علماکے اعزاز میں ایک استقبالیہ تقریب کا انعقادکیاگیا۔جس کی صدارت ولی عہدداعی اسلام مولانا حسن سعید صفوی ازہری نے فرمائی۔محفل کاآغازتلاوت پاک اورنعت نبی صلی اللہ علیہ وسلم سے ہوا۔مولانامحمدذکی کے استقبالیہ خطاب کے بعدمولانا رفعت رضا نوری نے طلبہ اور اساتذہ کی جانب سے جامعہ ازہر سےتبلیغی کورس مکمل کرنے پر مولانا مجیب الرحمٰن علیمی، مولانا مقصود عالم سعیدی اور قاری سرفراز سعیدی کو ہدیہ و تبریک پیش کیا ۔ واضح رہے کہ اس موقع پر ایڈیٹرماہنامہ’’ خضرِ راہ‘‘ ڈاکٹر جہاں گیر حسن مصباحی کو پی ایچ ڈی کی ڈگری تفویض ہونے پراُنہیں مبارک بادی پیش کی گئی ۔
مولانا مجیب الرحمٰن علیمی ازہری نےطلبہ واساتذہ سے اپنےتجربات بیان کیے،اوربڑےہی جامع انداز میں جامعہ ازہر، مصرکے اساتذہ کے تعلیمی و تدریسی ذوق وشوق،اوروہاں کےنظام تعلیم کے حسن پر روشنی ڈالنے کے ساتھ ،یہ بھی بتایاکہ جامعہ ازہر مسلکی و گروہی نظریات سے اوپر اٹھ کر خالص روحانیت اور دین فطرت کا مبلغ و داعی ہے۔
مولانا مقصود عالم سعیدی ازہری نے مصری اساتذہ کے اخلاقی وتربیتی پہلو کی خوبیاں بیان کیں اوربتایا کہ جس طریقے سےجامعہ ازہر تعلیم اور قیادت کے معاملے میں عالم اسلام کی نمائندگی کررہا ہے، اسی طرح سے اخلاقی و تربیتی پہلو پر بھی وہ حد درجہ حساس ہےاور قابل تقلید و نمونۂ عمل ہے ۔ انھوں نے طلبہ کویہ نصیحت بھی کی کہ جس طریقے سے اچھا استاذ بننے کے لیے پہلے اچھا شاگرد ہونا ضروری ہے ، اسی طرح اچھا مبلغ بننے کیے لیے بہترین مدعو ہونا بھی ضروری ہے ۔
قاری سرفرازاحمد سعیدی نے وہاں کے تعلیم قرأت کے نظام سےبخوبی واقف کرایااورکہا کہ جامعہ ازہر،مصر میں قرآن کریم کی تلاوت کے ساتھ قرأ ت پربھی کافی توجہ دی جاتی ہے،اور اس کابہترین نظم و نسق ہے ۔
0 Comments
اپنی رائے پیش کریں