Yahi Hai Meri Arzoo Ya Ilahi / Na Mere Dil Na Jigar Par Na Deeda e Tar Par

Alehsan Media مارچ 18, 2017

مناجات عاشقان الٰہی

یہی ہے مری آرزو یا الٰہی
کہ دیکھوں تجھے چار سو یا الٰہی

یہی اک تمنا ہے روز ازل سے
کہ دل میں ہو بس تو ہی تو یا الٰہی

ترا آئینہ ہیں ترے خاص بندے
زمیں پر ہیں یہ تیری بو یا الٰہی

وہ کیوں کر نہ کھو جائے جلوؤں میں تیرے
کرے جو تری جستجو یا الٰہی

جدھر دیکھتا ہوں جہاں دیکھتا ہوں
نظرمیں ہے بس تو ہی تو یا الٰہی

کدھر جائوں میں چھوڑ کر تیرے در کو
کہ مولیٰ ہے بس میرا تو یا الٰہی

سعیدؔ اللہ اللہ کس سے کہوں میں
کہ ہے میرے پردہ میں تو یاالٰہی

شیخ ابو سعید شاہ احسان اللہ محمدی

تربت پیمبر پر

نہ میرے دل نہ جگر پر نہ دیدۂ تر پر
کرم کرے وہ نشانِ قدم ہو پتھر پر

تمہارے حسن کی تصویر کوئی کیا کھینچے
نظر ٹھہرتی نہیں عارضِ منور پر

کسی نے لی رہِ کعبہ کوئی گیا سوئے دیر
پڑے رہے ترے بندے مگر ترے در پر

گناہ گار ہوں میں واعظو تمھیں کیا فکر
مرا معاملہ چھوڑو شفیعِ محشر پر

ان ابروؤں سے کہو کشتنی میں جان بھی ہے
اسی کے واسطے خنجر کھنچا ہے خنجر پر

پلا دے آج کہ مرتے ہیں رند اے ساقی
ضرور کیا کہ یہ جلسہ ہو حوض کوثر پر

صلاحیت بھی تو پیدا کر اے دلِ مضطر
پڑا ہے نقش کفِ پائے یار پتھر پر

وفورِ جوشِ ضیا اور ان کے دانتوں کا
حباب گنبدِ گردوں ہے آبِ گوہر پر

اخیر وقت ہے آسیؔ چلو مدینے کو
نثار ہو کے مرو تربتِ پیمبر پر

حضرت آسی غازی پوری علیہ الرحمہ