Islam Aur Kasb e Maal Ka Tasawwur

اسلام اور کسب مال کا تصور

مولانا شاہد رضا ازہری

اسلام نے انسان کی رہنمائی زندگی کے ہر موڑپر کی ہے،چاہے گھریلو زندگی ہو یا عوامی،تجارت کی دنیا ہو یادولت کمانے کی،گویا اسلام نے ہر اعتبارسے انسان کے لیے کچھ ایسا اصول اورضابطہ مقررکیاہے کہ انسان اگر سچے دل سے اپنالے تواسے اللہ کاانعام بھی حاصل ہوگا اوراس کی روزی روٹی بھی حلال ہوجائے گی۔ اس لیے مال ودولت حاصل کرتے وقت سب سے پہلے یہ بات ذہن میں ہونی چاہیے کہ دولت حاصل کرنے کا اسلامی نظریہ کیا ہے؟اسلام نے کس طرح سے مال حاصل کرنے کی اجازت دی ہے؟ کہیں ایسا تو نہیں ہے کہ جس راستے سے انسان مال واسباب جمع کررہا ہے وہ راستہ اسلامی نظریے کے خلاف ہو۔

کبھی کبھی ایسا بھی ہوتا ہے کہ انسان مال ودولت سے اس قدر محبت کرتاہے کہ وہ مال ودولت ہی کوسب کچھ سمجھ لیتاہے کہ یہ مال ہی اصل زندگی ہے اوریہی اس کی نجات کا ذریعہ ہے،جو ایک طرح کی ناسمجھی اور نادانی ہے، کیونکہ کال مارکس کی طرح مادہ پرست ہونا اور مال ودولت ہی کو سب کچھ تصورکرلینایہ ایک سیکولرزم اورکمیونزم کی سوچ توہوسکتی ہے ، لیکن ایک صالح اور نیک مسلمان کی فکر ہرگز نہیںہو سکتی ہے ۔

کبھی یہ بھی ہوتاہے کہ ایک سادہ لوح مسلمان مادہ پرست شیطانوں کے بہکاوے میں آ جاتاہے اور پھروہ اپنے دین سے یوںالگ ہوجاتاہے کہ برائے نا م ہی مسلمان باقی رہ پاتاہے،اور پھرایک دن وہی مسلمان اسلام پر طعن وتشنیع اور زبان درازی کرنا شروع کردیتا ہے، جس کا اصل سبب یہ ہوتا ہے کہ نہ وہ مال کمانے کے صحیح اسلامی اصول سے باخبرہوتا ہے، نہ اسے قانون ساز نبی صلی اللہ علیہ وسلم کی محبت حاصل ہوتی ہے اور نہ ہی اسے اپنی تخلیق کا مقصد معلوم ہوتاہے کہ اللہ تعالی نے اسے کیوں پید ا فرمایاہے،اس لیے کہ اگر اسے اپنی حیات کامقصد معلوم ہوتا تووہ اللہ تعالیٰ اور اس کے رسول صلی اللہ علیہ وسلم کی ذات پر مال کو فوقیت نہیں دیتا ،بلکہ رب کائنات جل جلالہ کی عبادت وریاضت کرتا اور اس کی معرفت حاصل کرتا،جیساکہ ا للہ تعالی کاارشاد ہے :

وَمَاخَلَقْتُ الْجِنَّ وَالْإِنسَ إِلَّا لِیَعْبُدُون۔(سورہ ذاریات،آیت:۵۶)

یعنی میں نے جنات ا ورانسان کو اپنی عبادت کے لیے پیدا کیا ہے۔

اس آیت مقدسہ کی تفسیر میں حضرت عبداللہ بن عباس رضی اللہ عنہمافرماتے ہیں کہ یہاں’’ لیعبدون‘‘ سے مرا د ’’لیعرفون‘‘ہے۔

اب مطلب یہ ہوا کہ اللہ تعالی نے اپنے بندوں کو اپنی معرفت کے لیے پید ا فرمایا ہے، اس سے یہ بات بھی روشن ہوجاتی ہے کہ بندوں کی پیدائش صرف اللہ کی عبادت ومعرفت کے لیے ہوئی ہے نہ کہ محض دولت کمانے کے لیے۔ہاں!البتہ مال ودولت کو اس فانی دنیامیں زندگی گزارنے کے لیے اسباب ضرور بنا یاہے ۔

اب اگر اللہ تعالی انسان کو مال ودولت عطا فرماتاہے تو یہ اس کا فضل واحسان ہے اور اگر وہ انسان کو مال ودولت عطا نہیں فرماتاہے تو یہ اس کا عدل وانصاف ہے۔ جب اللہ تعالی مال و دولت سے نواز تاہے تو اس کا صحیح استعمال کرنا بھی لازم وضروری ہے۔اس تعلق سے مرشد العلماء داعی اسلام حضرت خواجہ ابو سعید شاہ احسان اللہ حفظہ اللہ کی وہ مجلس یاد آرہی ہے جس میں انھوں نے فرمایا تھاکہ:

مال کمانا کوئی عیب نہیں ہے لیکن انسان اس مال ودولت کو اس نیت سے حاصل کرے کہ وہ مال اس کے لیے آخرت میں نجات کاذریعہ بن جائے اوراسے اللہ کی راہ میں خرچ کرے تاکہ اس کا مال پاک بنادیا جائے تو وہ مال:’’ الدُنْیَا مَزْرَعَۃُ الآخِرَۃِ۔‘‘یعنی دنیاآخرت کی کھیتی ہے ،کے مصداق ہوگااور اس مال سے انسان فلاح وبہبود حاصل کرسکتاہے ، ورنہ بصورت دیگر وہی مال اس کے لیے فسق وفجو ر اور دنیا وآخرت میں ذلت ورسوائی کاسبب بن سکتاہے ۔

کوئی بھی چیز اپنی ذات میں بری نہیں ہوتی ہے،بلکہ اصل اس کے استعمال کے اوپر ہے کہ اگر انسان اپنے مال کو اللہ کی رضاکے لیے خرچ کرے تو وہ مال اس کے لیے دنیا اورآخرت کی کھیتی ہے اور اگر اسی مال کو برے راستے میں خرچ کرے تو وہی مال اس کے لیے دنیاا ورآخرت میں عذاب کا سبب ہے،اب انسان خود فیصلہ کرے کہ وہ کون سی کھیتی پسند کرے گا۔

یہ بات یقینا سب پرواضح ہوچکی ہے کہ ساری چیزوں کا خالق اللہ تبارک وتعالیٰ ہے ،ہر چیز اسی کے حکم سے وجود میں آئی ہے،اس لیے مخلوق کے بجائے خالق سے گہرا رشتہ جوڑیں اور اسی کے حکم کے منتظر رہیں کہ وہ :

’’اِنَّ اللّٰہَ عَلٰی کُلِّ شَیْْء ٍ قَدِیر۔‘‘ہے ،یعنی وہ ہر اس چیز پر قادر ہے جو اس کی شان کے لائق ہے، جس کو جس مقدار میں جتنے مال کی ضرورت ہوتی ہے وہ عطا کرتاہے، کس قدر رحیم ہے وہ ذات کہ ہم نا فرمانی کرتے ہیں پھر بھی وہ اپنے رزق کادروازہ ہم پربند نہیں کرتاہے ،بلکہ وہ اپنے شان کریمی کا مظاہرہ کرتاہے اور جہاں اچھے سے اچھے بندے کو رزق دیتا ہے وہیں بدبخت سے بدبخت بندے کو بھی نوازتا رہتاہے۔اس لیے انسان کوسب سے پہلے یہ تصور کرناچاہیے کہ یہ مال جسے وہ حاصل کررہا ہے،وہ اللہ تبارک وتعالی کا مال ہے ،یہ ملک اسی کاملک ہے، یہ کائنات اسی کی کائنات ہے،بلکہ تقریباً اٹھارہ ہزار عالم اسی کے خالق ومالک ہونے کی گواہی دے رہا ہے۔ چنانچہ اب انسان مال اورثروت حاصل کرے تواسے چاہیے کہ وہ اسلام کے بتائے ہوئے طریقے اور ضابطے کے مطابق حاصل کرے ،کیونکہ انسان جو کچھ بھی مال ودولت،سونا چاندی، زراعت ومعیشت اورصنعت وحرفت حاصل کرتاہے تو یہ سبھی اللہ تعالی کی ملکیت ہوتی ہے،جیساکہ اللہ تبارک وتعالی ارشاد فرماتاہے:

’’ وَاٰتُوہُمْ مِنْ مَّالِ اللّٰہِ الَّذِیْ اٰتَاکُمْ ۔‘‘(سور ہ نور،آیت:۳۳)

یعنی لوگوں کو اللہ کے اس مال میں سے دو جو اُس نے تم کو دیا ہے۔

اسی طرح غلط طریقے سے مال حاصل کرنے کی ممانعت کے کے تعلق سے قران پاک میں آیا ہے:

وَلَا تُکْرِہُوْا فَتَیَاتِکُمْ عَلَی الْبِغَاء إِنْ أَرَدْنَ تَحَصُّناً لِّتَبْتَغُوا عَرَضَ الْحَیَاۃِ الدُّنْیَا۔‘‘(سورہ نور،آیت:۳۳)

یعنی تمہاری باندیاں پاک دامن رہنا چاہیں تو ان کو بد کاری پر مجبور نہ کرو تاکہ اُس سے دنیاوی زندگی میں تم فائدہ حاصل کرو۔

زمانۂ جاہلیت میں لوگ باندیوں کو دوسروں کے حوالے کرکے انھیں برائی پر مجبور کرتے تھے اور ناجائز طریقے سے دولت کماتے تھے،اسے اسلام نے سختی سے روکا ۔

امام زہری بیان کرتے ہیں کہ جنگ بدر میں قریش کا ایک شخص قید ہو گیا جو منافقوں کے سردار عبد اللہ ابن ابی سلول کے گھر میں تھا ۔ عبداللہ ابن ابی کی ایک باندی تھی جس کا نام معاذہ تھا ، قیدی اس کے ساتھ بدکاری کرنا چاہتا تھا اور باندی مسلمان ہونے کے سبب منع کرتی تھی ۔اس پر ابن ابی اس کو مارتا تھا اور اس کام پر مجبور کرتا تھا ،کیونکہ اسے امید تھی کہ وہ باندی اس قیدی سے حاملہ ہو جائے گی اور ابن ابی اس قیدی سے اس بچے کا فدیہ طلب کرے گا ۔

حدیث شریف میں ہے:

’’عَنْ أَبِی ہُرَیْرَۃَ رَضِیَ اللّٰہُ عَنْہُ عَنْ النَّبِیِّ صَلَّی اللّٰہُ عَلَیْہِ وَسَلَّمَ قَالَ یَأْتِی عَلَی النَّاسِ زَمَانٌ لَا یُبَالِی الْمَرْء ُ مَا أَخَذَ مِنْہُ أَ مِنَ الْحَلَالِ أَمْ مِنْ الْحَرَامِ‘‘(صحیح بخاری/بَاب مَنْ لَمْ یُبَالِ مِنْ حَیْثُ کَسَبَ الْمَالَ)

ترجمہ:حضرت ابو ہریر ہ رضی اللہ تعالی عنہ بیان کرتے ہیں کہ رسول اللہ صلی اللہ علیہ وسلم نے فرمایا کہ لوگوں پہ ایک ایسا زمانہ آئے گا جس میں کوئی شخص یہ پرواہ نہیں کرے گا کہ اس نے مال کہاں سے لیا ہے ،وہ حلال ذریعہ سے حاصل کیا ہے یا حرام ذریعہ سے ۔

دورحاضر میں اس کی کھلی ہوئی مثال دیکھی جاسکتی ہے ، جس سے بچنا ہر مسلمان کا ایمانی فریضہ ہے ورنہ کل قیامت میں اس عمل کے لیے سخت حساب لیاجائے گا۔

آج دنیا میں تجارت اورکاروبار مال حاصل کرنے کابہترین ذریعہ ہے، جب کہ مال حاصل کرنے کا طریقہ ناجائز اورحرام نہ ہو، اورجس میں کوئی دھوکہ ا ورفریب نہ ہو،یہی وجہ ہے کہ اسلام نے بے روزگاری ،کاہلی اور سستی سے منع فرمایا ہے اور مسلمانوں کو جد و جہد اور محنت ومشقت پر آمادہ کیاہے، تاکہ انسان جو مال کمائے وہ پاک اور حلال مال ہو،اس لیے حکم دیاگیاہے کہ اگر بھلائی اور نفع چاہتے ہوتو زمین میں پھیل کراللہ کی نعمت تلاش کرو ،ارشاد باری تعالیٰ ہے:

’’فَامْشُوا فِیْ مَنَاکِبِہَا وَکُلُوا مِن رِّزْقِہٖ وَإِلَیْْہِ النُّشُور۔‘‘(سورہ ملک ،آیت:۱۵)

یعنی اس کے راستوں پر چلو اور اس کی روزی میں سے کھائو اور اسی کی طرف اٹھنا ہے۔

مزید ارشاد باری تعالیٰ ہے:

’’وَآخَرُونَ یَضْرِبُونَ فِیْ الْأَرْضِ یَبْتَغُونَ مِن فَضْلِ اللَّہِ وَآخَرُونَ یُقَاتِلُونَ فِیْ سَبِیْلِ اللّٰہِ۔‘‘ ( سورۂ مزمل ،آیت:۲۰)

یعنی اور کچھ لوگ زمین میں اللہ کا فضل تلاش کرنے کے لیے سفر کریں گے اور کچھ اللہ کی راہ میں جہاد کریں گے ۔

حضرت انس بن مالک رضی اللہ عنہما فرماتے ہیں کہ رسول اللہ صلی اللہ علیہ وسلم نے فرمایا: حلال رزق طلب کرنا ہرمسلمان پر واجب ہے۔

حضرت عبد اللہ ابن عمر رضی اللہ عنہما فرماتے ہیں کہ رسول اللہ صلی اللہ علیہ وسلم نے بیان فرمایا : حلال رزق کا طلب کرنا جہاد ہے۔

چنانچہ معلوم ہواکہ مال کمانے کااسلامی طریقہ یہی ہے کہ مال حاصل کرنے کے لیے ایسی صورت اختیارکی جائے جس سے کسی کی حق تلفی نہ ہو،کسی کا دل نہ دکھے ، مناسب نفع لیا جائے اور جس سے اللہ اور اس کا رسول صلی اللہ علیہ وسلم راضی ہو جائے اورایساکرنے کے لیے ضروری ہے کہ انسان اسلام ، ایمان اوراحسان پر عمل کرے اوریہ اس وقت تک ممکن نہیں ہے جب تک انسان کسی شیخ کامل کی صحبت نہ اختیار کرے ۔