Advanced Diploma in Dawa and Islamic Studies: Tahqeeq o Tafkeer Ki Dawat

الدبلوم العالی فی الدعوۃ والعلوم الاسلامیۃ

تحقیق و تفکیر کی دعوت

اس پر فتن ماحول میں جب کہ طلبۂ مدارس کے اندر ذہنی جمود اور فکری تعطل کی بہتات ہے ،جس کے سبب علم وتحقیق کی ساری راہیں مسدود ہوتی نظر آتی ہیں اور طلبہ کے اندر علمی جولانیت ، فکر ی بلندی ، تحقیقی اور تجزیاتی نظر اور اکابرینِِ امت کے مواقف کے دلائل سے واقفیت جس طرح ہونی چاہیے، وہ یکسر معدوم ہے۔ ایسے میں طلبہ کے اندر تحقیق وتنقید کا اعلیٰ شعور پیدا کرنا از حد ضروری ہےاور ایسے فکر وشعور کے لیے ضروری ہے کہ انھیں اندھی عقیدت کی کال کوٹھری سے نکال کروسیع الفکری اور وسعتِ قلبی کے میدان میں لاکھڑا کیا جائے اور پھر انھیں اس بات کی بھی یاددہانی کی جائے کہ یہ کوئی ضروری نہیں کہ ایک بات اگر ہمارے کسی بزرگ نے کہی ہےتو وہی حق ہے اور اس کے علاوہ سارے اقوال باطل اور فاسد ہیں بلکہ ایسابھی ہوسکتا ہے کہ ہمارےوہ بزرگ مشقِِ پیہم اور جہدِ مسلسل کے باوجودبعض مسائل میں حق تک نہ پہنچے ہوں؛ کیوں کہ اصابتِ حق اللہ تعالیٰ کا فضل ہوتا ہے اور وہ جسے چاہتاہے عطا فرماتا ہے۔یا ایسا بھی ہو سکتا ہے کہ ا ن کے زمانے میں مسئلہ کی نوعیت وحقیقت کچھ اور رہی ہو اور ہمارے زمانے میںحالات بدل گئے ہوں ۔

اس کے ساتھ یہ بھی بتایا جائے کہ ہمارے اکابر نے جن مسائل کی تحقیق کی ہے ایسا نہیں ہے کہ ان مسائل میں اب از سرِ نو تحقیق نہیں ہوسکتی یا جن مسائل کو ہمارے اکابر نے چھوڑ دیا ہے ان مسائل کا بیان اب نہ کیا جائے بلکہ ہر زمانہ میں عرف اور لوگوں کی حالتیں امتدادِ زمانہ کی بنیاد پر بدلتی رہتی ہیں اور سیکڑوں مسائل ایسے ہیں جو ہر زمانہ میں پیدا ہوتے ہیں، جن کی تحقیق اس زمانے کے ماہر مفتی اورعالم کی عین ذمہ داری ہے ۔

جب ہم جامعہ عارفیہ کے شعبۂ دعوہ کے نظامِ تعلیم پر طائرانہ نگاہ ڈالتے ہیں تو ہمیں یہ ساری باتیںاور خوبیاں اس کے اندربہت حد تک موجود نظر آتی ہیں۔ جامعہ عارفیہ صرف ایک مدرسہ نہیں ہے بلکہ تعلیم و تربیت اور تحقیق و تفکیر کا ایک حسین امتزاج ہے۔اس میں جہاں ایک طرف قال اللہ وقال الرسول کا درس دیا جاتا ہے تو دوسری طرف ضربِ لاالٰہ الااللہ سےقلوبِ کُشتہ میں زندگی کی رمق ڈالی جاتی ہے۔ جہاں قرآن وحدیث کی تعلیم سے ان کے ذہن وفکر کو صیقل کیا جاتا ہے وہیں دوسری جانب تصوفانہ مزاج ومذاق سے ان کے قلوب کا تزکیہ بھی کیا جاتا ہےاور جہاں انھیں بارگاہِ رسالت مآب صلی اللہ علیہ وسلم اور اکابرینِِ امت کا باادب بنایا جاتا ہے وہیں تحقیق وتفتیش اور تنقیدو تجزیہ کے راستوں سے بھی آشنا کیا جاتا ہے ۔ اس مدرسہ کے شعبۂ دعوہ کا نظامِ تعلیم اس قدر منظم اور مربوط ہے کہ بعض طلبہ فضیلت وافتا کی دستار کے بعد بھی اس شعبہ میں داخلہ کے مشتاق ہوتے ہیں اور ان کی یہ دلی خواہش ہوتی ہے کہ وہ اس مدرسہ میں شعبۂ دعوہ کا دو سالہ کورس کریں اوراپنے اندر تحقیقی فکر اور تنقیدی شعور کو پروان چڑھائیں اور ثانوی مآخذ ومصادر سے اٹھ کر اصل مآخذ ومصادر تک مراجعت حاصل کریں۔

المختصر یہ کہ آج کے اس ماحول میں تحقیق وتنقید اور تفتیش وتفحص کے لیے جن اصول وضوابط کی ضرورت پڑتی ہے جامعہ عارفیہ کے شعبۂ دعوہ کے اندر ان ساری چیزوں کی فراہمی کی کوشش کی جاتی ہے ۔لہٰذا ہر نوفارغ طالبِ علم کو چاہیے کہ وہ اس ادارہ کے شعبۂ دعوہ میں کم ازکم دوسال وقف کرے تاکہ اس نے فضلیت تک جو تعلیم حاصل کی ہے اسے عملاً برتنے کے آداب سےآشنا ہو ۔ یہاں آکر اسے اس بات کا بھی اندازہ ہوگا کہ آج مدارس میں جس طرح کاتعلیمی نطام ہے اس میں کس قدر ترمیم وتبدیل کی ضرورت ہے اور اسے تحقیقی بنانے کے لیے کتنے مراحل سے گزرنا پڑےگا۔